【見工迫人add facebook】
之前寫倫敦金同埋領袖課程就係驚有人被騙，諗住教大家點樣守住個荷包，唔好俾啲豺狼呃晒啲血汗錢，點知原來講漏咗另一種狼，就係色狼。
雖然DSE喺7月先放榜，不過好多學生已經開始搵intern嘅工作，近呢個星期分別有兩個女仔同我講，個男interviewer問佢哋攞facebook或者ig contact (interviewer未必係hr，可能係個department head)，仲夾硬要人哋add佢，呢兩個case都係來自不同公司，全部都係自己喺求職網send cv去，可能冇中間人令啲色狼更肆無忌憚啦。
坦白講，就算做同事，都未必一定要add你facebook啦，何況人哋嚟見工咋，仲係見intern嘅小妹妹，又唔係in記者、編輯、PR，我真係睇唔到任何原因要add facebook囉，做得interviewer，唔該 pro啲啦！
inbox我呢位小妹妹已經處理得好好，有時喺現場真係勁老尷，唔好忘記你份cv仲喺佢手，對方知道你好多資料，所以拍枱離場或多或少有顧忌。不過點都好，如果有啲咁公私不分、見女開眼嘅同事，奉勸各位諗清楚先至好做，睇怕入去做intern都學唔到嘢。
如果有更好嘅應對方式，不妨留言俾大家參考，因為連見工都要迫人add facebook嘅賤Han，又點止兩個咁少吖。
Search